Tiranë, më 26 Maj 2010

Njoftim i Ministrisë së Arsimit dhe Shkencës për shtëpitë dhe entet botuese

Në zbatim të:

• Urdhrit Nr. 278, datë 20.05.2010 “Për krijimin dhe funksionimin e bordit të rekomandimit të literaturës shkencore dhe didaktike për bibliotekat e shkollave në arsimin parauniversitar”,
• Urdhrit Nr. 279, datë 20.05.2010 “Për krijimin dhe funksionimin e bordit të rekomandimit të literaturës artistike dhe lëndëve shoqërore për bibliotekat e shkollave në arsimin parauniversitar”,

të ministrit të Arsimit dhe Shkencës, Z. Myqerem Tafaj, ju njoftojmë:

Bordi i rekomandimit të literaturës shkencore dhe didaktike për bibliotekat e shkollave do të marrë në shqyrtim botimet me vlera të karakterit formues dhe edukues në fushën e lëndëve shkencore, si dhe botimet didaktike për të gjitha lëndët e programit mësimor.

Bordi i rekomandimit të literaturës artistike dhe lëndëve shoqërore për bibliotekat e shkollave do të marrë në shqyrtim literaturën artistike me vlera të spikatura letrare, si dhe botimet me vlerë studimore në fushën e lëndëve shoqërore të programit mësimor.

Kriteret që duhet të respektojnë shtëpitë dhe entet botuese për përzgjedhjen e librave që do t’i paraqesin për shqyrtim në dy bordet e mësipërme:

1.Bordet do të shqyrtojnë botime të ofruara vetëm nga shtëpi dhe ente botuese.
2.Literatura e ofruar për nxënësit të jetë e përshtatshme me grupmoshën që i referohet, si dhe me programet mësimore të klasave I-XII. Literatura për mësuesit të jetë në përputhje me prioritet kombëtare për zhvillimin profesional të mësuesve dhe drejtuesve të shkollave.
3.Botimet që do të paraqiten në Bord, duhet të shoqërohen me:
-Shkresë zyrtare, ku të jepen titujt e paraqitur si dhe arsyetimi në bazë të të cilit shtëpitë dhe entet botuese kanë bërë përzgjedhjen, firmosur nga përfaqësuesi ligjor;
- 2 reçenca për çdo botim, hartuar nga autoritete të njohura të fushës së botimit përkatës, ku të evidentohen vlerat si dhe përshtatshmëria e veprës me kërkesat e programit mësimor dhe përdoruesve (nxënës, mësues) të cilëve u adresohet;
- Certifikatën e lëshuar nga “Zyra për Mbrojtjen e të Drejtës së Autorit”;
- Kontratën e shtëpisë botuese apo entit botues me autorin apo titullarin e të drejtave mbi veprën origjinale, të konfirmuar nga Zyra Shqiptare për të Drejtat e Autorit (ZSHDA).
- 3 (tri) kopje për çdo libër;
4. Për botimet e përkthyera, bordet do të preferojnë përkthimin nga gjuha origjinale.
5. Bordet përjashtojnë nga shqyrtimi çdo botim i cili ka në përmbajtjen e vet aspekte të diskriminimit të ndaluara me ligj në Republikën e Shqipërisë.

Listat e literaturës së përzgjedhur nga bordet do të publikohet në faqen zyrtare të internetit të MASh, si dhe në organin e saj zyrtar të shtypit. Jashtë kësaj liste nuk mund të zgjidhet as edhe një titull për bibliotekat shkollore.

Ftojmë shtëpitë dhe entet botuese të paraqesin botimet e tyre në MASH brenda datës 10.06.2010.