Tiranë, më 22 Tetor 2009

Ministri Tafaj: Inkurajim për arsimin e lartë privat cilësor.

Ministri i Arsimit dhe Shkencës, Z. Myqerem Tafaj u takua me disa përfaqësues të shkollave të larta private në Shqipëri.

Ministri Tafaj gjatë takimit, vlerësoi arritjet e deritanishme në zhvillimin e arsimit të lartë, duke theksuar se tashmë numri I studentëve është rritur ndërsa vëmendja e qeverisë në këtë mandat do të jetë cilësia.

“Qeveria është shumë e impenjuar për ti krijuar lehtësira arsimit të lartë privat,-tha Ministri Tafaj. Gjatë këtij mandati reformimi i sistemit të financimit në arsimin e lartë është prioriteti kryesor në këtë fushë.”

Ai vuri theksin mbi investimin që këto universitete duhet të bëjnë për burimet njerëzore, veçanërisht rekrutimi I asistentëve dhe pedagogëve me mastera dhe doktorata. “Ju inkurajoj për të thithur më shumë kandidatë në kuadër të programit “Brain Gain”.

Rektorët e universiteve “Luarasi” dhe “Polis”, Z. Aleks Luarasi dhe Z. Besnik Aliaj si dhe administratori I UET, Z. Henri Çili duke falenderuar Ministrin Tafaj për të gjithë mbështetjen që po jep në zhvillimin e këtij arsimi, e njohën me angazhimet konkrete të tyre për thellimin e proçesit të reformimit e modernizimit të arsimit privat në vendin tonë, me theks zhvillimin e një arsimi cilësor.

Ata kërkuan një nivel te ri bashkëpunimi mes qeverisë dhe aktorëve të rinj, lehtësimin fiscal për heqjen e TVSH-së dhe mundësitë reale për të inkurajuar në drejtime të ndryshme zhvillimin e sektorit privat.

Më pas Ministri Tafaj dhe përfaqësesit e institucioneve private bashkëbiseduan mbi rolin e ri që duhet të marrë shteti në arsimin e lartë për nje reformim tërësor të financimit në arsim si dhe nevojën e klasifikimit te diplomave që jepen nga i gjithë sistemi ynë universitar përmes një agjensie ndërkombëtare të besueshme.